துணுக்காய், தேறாங்கண்டல் பகுதியில் காட்டு யானைகளின் தொல்லை!
முல்லைத்தீவு – துணுக்காய், தேறாங்கண்டல் பகுதியில் காட்டு யானைகளின் தொல்லை அதிகரித்து காணப்படுவதால் பெருமளவான பயிரழிவுகள் ஏற்படுவதாக விவசாயிகள் மற்றும் பொது மக்கள் தெரிவித்துள்ளனர்.
முல்லைத்தீவு மாவட்டத்தின் துணுக்காய், தேறாங்கண்டலில் மக்கள் குடியிருப்புக்கள் மற்றும் பயிர் செய்கை நிலங்கள் போன்ற பகுதிகளில் தொடர்ச்சியாக காட்டுயானைகள் உட்புகுந்து பெரும் அழிவுகளை ஏற்படுத்தி வருகின்றன.
அதிலும் குறிப்பாக காட்டு யானைகள் நெற் பயிர்களையும் ஏனைய மரவள்ளி, பூசணி போன்ற தோட்ட பயிர்களையும் அழித்து வருகின்றன.
இந்த நிலையில் நேற்றைய தினம் இரவு ஊர் மனைக்குள் புகுந்த காட்டுயானைகள் பாரிய சேதங்களை ஏற்படுத்தியிருந்ததாக தெரியவருகிறது.
கடந்த காலங்களில் இவ்வாறான யானைகளின் தாக்கங்கள் இல்லை என்றும் அண்மைய நாட்களாகவே இவ்வாறு யானைகளால் ஏற்படும் பாதிப்பு அதிகரித்துள்ளதாகவும் மக்கள் தெரிவித்துள்ளனர்.
